«Հայաստանյան խաղաղության նախաձեռնությունը» (API)՝ Հայաստանում Ֆրանսիական համալսարանի (UFAR) և «Ձեռնարկությունների ինկուբատոր» հիմնադրամի (EIF) հետ համատեղ, հաջողությամբ ավարտեց կիբերանվտանգության իր չորրորդ ինտենսիվ դասընթացը, որն անցկացվեց 2025 թվականի փետրվարի 24-ից մարտի 21-ը։ Այս հերթական դասընթացն ընդգծում է API-ի հանձնառությունը՝ աջակցելու հայկական ընկերությունների և բանկային կառույցների մասնագետների կարողությունների ամրապնդմանը՝ աճող թվային սպառնալիքների պայմաններում։
Դասընթացը, որը նպատակաուղղված էր հեռահաղորդակցության, հանրային ծառայությունների, բանկային համակարգի ոլորտներում և նախարարություններում աշխատող մասնագետների հատուկ կարիքների բավարարմանը, մեկտեղել էր տասնհինգ մասնակից, որոնցից տասնչորսը ծրագրի ավարտին արժանացել են ավարտական վկայականի։ Վեց տեխնիկական մոդուլներից կազմված ծրագիրը հիմնված էր գործնական և կիրառական հստակ մոտեցման վրա՝ ընդգրկելով տեսական պարապմունքներ, գործնական վարժություններ, կիրառական առաջադրանքներ, դեպքերի ուսումնասիրություն և շարունակական գնահատում։
Ծրագիրն իրականացվում էր ֆրանսիացի առաջատար մասնագետների ղեկավարությամբ
Դասընթացը վարում էին Ռեն-Սեն-Մալոյի համալսարանի դասախոս Սեբաստիան Բարգիրջյանը և Orange ընկերության ամպային հաշվարկների ճարտարապետ Նիկոլա Ռենարը։ Նրանց փոխլրացնող հմտությունները ապահովեցին դասավանդման բարձր մակարդակ և գիտելիքների արդյունավետ փոխանցում հետևյալ ոլորտներում՝ կիբերանվտանգության հիմունքներ, ցանցեր, համակարգերի կառավարում և անվտանգություն, վիրտուալացում, թվային դատաբժշկական փորձաքննություն և ներթափանցման փորձարկում (Pentest)։
Դասընթացի մասնակիցներն աշխատել են մոդելավորված միջավայրերում՝ կիրառելով վիրտուալացման գործիքներ, Linux համակարգեր և խոցելիությունների վերլուծության իրականությանը մոտ սցենարներ՝ ինտերակտիվությամբ, խստապահանջությամբ և թիմային նվիրվածությամբ առանձնացող աշխատանքային մթնոլորտում։
Ucom-ի գլխավոր գործադիր տնօրեն Ռալֆ Յիրիկյանի ելույթը
2025 թվականի մարտի 1-ին «Յուքոմ» ընկերության գործադիր տնօրեն Ռալֆ Յիրիկյանը ելույթ ունեցավ արտահերթ հանդիպման ընթացքում։ Նրա ելույթի հիմնական առանցքը 21-րդ դարում բիզնեսի համար կիբերանվտանգության ռազմավարական նշանակությունն էր, որից հետո տեղի ունեցավ բաց քննարկում հանդիպման մասնակիցների հետ։ Այս համատեքստում պարոն Յիրիկյանը կրկին ընդգծեց, որ կազմակերպությունները պետք է ապահովված լինեն վստահելի մարդկային և տեխնոլոգիական ռեսուրսներով՝ ժամանակակից թվային սպառնալիքներին արդյունավետ դիմակայելու նպատակով։
«Կիբերանվտանգության իմացությունն այլևս ոչ թե պարզապես տարբերակ է, այլ՝ մեր համընդհանուր պարտականությունը։ Մեր մասնագետների վերապատրաստումը նշանակում է երաշխավորել թվային էկոհամակարգի կայունությունն ու անվտանգությունը»,– նշեց «Յուքոմ» ընկերության գործադիր տնօրեն Ռալֆ Յիրիկյանը։
Հայաստանի թվային դիմադրողականության ապահովման ռազմավարական նախաձեռնություն
Բարդ աշխարհաքաղաքական համատեքստում կիբերանվտանգության ամրապնդումը ազգային ինքնիշխանության խնդիր է: Այս ծրագրի միջոցով API-ն շարունակում է իր նպատակը՝ ձևավորել տեղական մասնագետների բազա, որը կարող է ապահովել երկրի կարևոր ենթակառուցվածքների և զգայուն տվյալների պաշտպանությունը։
Հիմնվելով չորրորդ դասընթացի հաջող փորձի վրա՝ API-ն արդեն պլանավորում է նոր դասընթացների իրականացում՝ նպատակ ունենալով ընդլայնել վերապատրաստման այս ծրագիրն իր ակադեմիական և արդյունաբերական գործընկերների հետ սերտ համագործակցությամբ ։ Այս նախաձեռնությունը երկարաժամկետ տեսլականի մի մասն է, որի նպատակն է Հայաստանն այնպիսի կենտրոնի վերածելը, որն ի վիճակի կլինի արդյունավետորեն արձագանքել կիբերանվտանգության ոլորտի մարտահրավերներին ինչպես ազգային, այնպես էլ տարածաշրջանային մակարդակներում։
Դասընթացի հովանավոր
